OLLA POLO BURATIÑO

Escribín liña por liña
á luz da miña saudade,
no colo dunha estreliña.

-A esa hora no Valiño
se cadra, a sombra das árbores
morrerá sobre o camiño..._

Ao acaba-la canción,
sequei a tinta, inda verde,
co pó da miña emoción.

E, logo funa botar,
ás altas horas da noite,
polo buzón do luar...

-Estaba todo calado,
no buzón había unha carta
dun luceiro namorado.

Máis tarde sentín pasar
ó peatón dunha nube
co correo do luar..._

... Cando por aí pase o vento,
Terriña do corazón,
nun sobre de sentimento
darache a miña canción...

(Iglesias Alvariño, A.)<